ພູເຂົາໄຟໃນພາກເໜືອຂອງເອທິໂອເປຍລະເບີດເປັນຄັ້ງທຳອິດໃນຮອບຫຼາຍກວ່າ 12,000 ປີ, ພົ່ນຂີ້ເທົ່າອອກມາປົກຄຸມຫຼາຍບ້ານ, ໃນຂະນະທີ່ຫຼາຍປະເທດກຳລັງກະກຽມຮັບມືກັບຜົນກະທົບຕໍ່ຖ້ຽວບິນ.

ອົງການຂ່າວຕ່າງປະເທດລາຍງານວ່າ ພູເຂົາໄຟ Hayli Gubbi ໃນພາກພື້ນ Afar ທາງພາກເໜືອຂອງເອທິໂອເປຍ ໄດ້ລະເບີດໃນຕອນເຊົ້າຂອງວັນອາທິດ ທີ 23 ພະຈິກ 2025 ເຊິ່ງປົກຄຸມບ້ານໃກ້ຄຽງດ້ວຍຂີ້ເທົ່າພູເຂົາໄຟ. ເຈົ້າໜ້າທີ່ທ້ອງຖິ່ນຢືນຢັນວ່າບໍ່ມີຜູ້ໄດ້ຮັບບາດເຈັບ ຫຼື ເສຍຊີວິດ, ແຕ່ການລະເບີດອາດຈະສົ່ງຜົນກະທົບຕໍ່ຊຸມຊົນທ້ອງຖິ່ນທີ່ສ່ວນໃຫຍ່ແມ່ນຊາວກະສິກອນລ້ຽງສັດ.

ພູເຂົາໄຟໄດ້ລະເບີດອີກຄັ້ງໃນຕອນແລງຂອງວັນຈັນ (24 ພະຈິກ) ກ່ອນທີ່ຈະອ່ອນລົງ, ພົ່ນຂີ້ເທົ່າ ແລະ ຄວັນໄຟຈຳນວນຫຼວງຫຼາຍລົງສູ່ເອທິໂອເປຍ ແລະ ຂ້າມທະເລແດງໄປຫາແຫຼມອາຣາເບຍ. ມັນຍັງໄດ້ປ່ອຍຊູນຟູຣ໌ໄດອອກໄຊດ໌ໃນປະລິມານທີ່ຫຼວງຫຼາຍ.

ສູນໃຫ້ຄຳປຶກສາກ່ຽວກັບຂີ້ເທົ່າພູເຂົາໄຟໃນເມືອງ Toulouse ປະເທດຝຣັ່ງ ໄດ້ອອກຄຳເຕືອນຕໍ່ເຮືອບິນທີ່ບິນຢູ່ໃນພາກພື້ນດັ່ງກ່າວ ໂດຍລະບຸວ່າຂີ້ເທົ່າໄດ້ພຸ່ງຂຶ້ນສູງເຖິງ 49,000 ຟຸດ.

ຜູ້ຄວບຄຸມການຈະລາຈອນທາງອາກາດໃນຫຼາຍພື້ນທີ່, ລວມທັງໃນບັນດາປະເທດທີ່ຢູ່ຫ່າງໄກເຊັ່ນອິນເດຍ, ພວມກະກຽມຮັບມືກັບຄວາມເປັນໄປໄດ້ຂອງການລົບກວນການບິນຍ້ອນຂີ້ເທົ່າທີ່ປົກຄຸມນ່ານຟ້າ.

ເວັບໄຊທ໌ Volcano Discovery ເຊິ່ງຕິດຕາມພູເຂົາໄຟທີ່ຍັງປະຕິບັດງານຢູ່ທົ່ວໂລກ ລະບຸວ່າບໍ່ມີການລະເບີດຂອງພູເຂົາໄຟ Hayley Gubbbi ໃນຊ່ວງ 12,000 ປີທີ່ຜ່ານມາ. ເຖິງຢ່າງໃດກໍ່ຕາມ, ບັນທຶກການລະເບີດຂອງພູເຂົາໄຟໃນພາກພື້ນນີ້ຂອງປະເທດເອທິໂອເປຍແມ່ນມີຈຳກັດເນື່ອງຈາກສະຖານທີ່ຫ່າງໄກສອກຫຼີກ.